ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಮತ್ತು ಇಂಡಿಯಾ ಒಕ್ಕೂಟದ ವಿಪಕ್ಷ ನಾಯಕರು ಸುಪ್ರೀಂ ಕೋರ್ಟ್‌ಗೆ ಚುನಾವಣಾ ಅಕ್ರಮಗಳು ಹಾಗೂ ಮತದಾರರ ಪಟ್ಟಿಗಳ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ಪ್ರಕ್ರಿಯೆಯನ್ನು ಪ್ರಶ್ನಿಸಿ ಸಲ್ಲಿಸಿರುವ ಜಂಟಿ ಅರ್ಜಿಯಲ್ಲಿ 14 ತಾಂತ್ರಿಕ ಲೋಪದೋಷಗಳು ಕಂಡುಬಂದಿವೆ ಎಂದು ಸುಪ್ರೀಂ ಕೋರ್ಟ್ ತಿಳಿಸಿದೆ.
ಅರ್ಜಿಯಲ್ಲಿ ಕೇವಲ 220 ರೂ. ನ್ಯಾಯಾಲಯ ಶುಲ್ಕ ಕೊರತೆ ಇರುವುದು ಮಾತ್ರವಲ್ಲದೆ, ಒಂಬತ್ತು ಅರ್ಜಿದಾರರಿಂದ ಅಗತ್ಯ ಸಮ್ಮತಿ ಪತ್ರಗಳು ಇಲ್ಲದಿರುವುದು ಹಾಗೂ ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರ ಗುರುತಿನ ಚೀಟಿಯ ಪ್ರತಿ ಸ್ಪಷ್ಟವಾಗಿ ಕಾಣಿಸದಿರುವುದು ಸೇರಿದಂತೆ ಹಲವು ದೋಷಗಳನ್ನು ಎತ್ತಿಹಿಡಿಯಲಾಗಿದೆ.
‘ವೋಟ್ ಚೋರಿ’ ಆರೋಪವು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾ‌ರ್ ಅವರ ವಿರುದ್ಧ ಹೊರಿಸಿ ದೆಹಲಿಯಲ್ಲಿ ಸಾವಿರಾರು ಬೆಂಬಲಿಗರೊಂದಿಗೆ ಬೃಹತ್‌ ಪಾದಯಾತ್ರೆ ನಡೆಸಿದ ದಿನವೇ ಈ ಅರ್ಜಿಯನ್ನು ದಾಖಲಿಸಲಾಗಿತ್ತು. ಆದರೆ, ಸುಪ್ರೀಂ ಕೋರ್ಟ್ ನೋಂದಣಿ ವಿಭಾಗವು ಪರಿಶೀಲನೆ ವೇಳೆ ಕೆಲವು ದಾಖಲೆಗಳ ಸ್ಪಷ್ಟತೆ ಕೊರತೆ, ಸಣ್ಣ ಅಕ್ಷರಗಳ ಬಳಕೆ, ಎರಡು ಪ್ರಮುಖ ದಾಖಲೆಗಳ ಬಣ್ಣದ ಪ್ರತಿಗಳನ್ನು ಸಲ್ಲಿಸದಿರುವುದು, ಮಸುಕಾದ ಹಾಗೂ ಅಸ್ಪಷ್ಟ ಪಠ್ಯ, ಪುಟಗಳ ಸಂಖ್ಯೆಯಲ್ಲಿನ ವ್ಯತ್ಯಾಸ ಮತ್ತು ಕಾಣೆಯಾದ ಪುಟಗಳಂತಹ ಲೋಪಗಳನ್ನು ಪಟ್ಟಿ ಮಾಡಿದೆ.
ಈ ಅರ್ಜಿಯನ್ನು ರಾಹುಲ್ ಗಾಂಧಿ, ಮಲ್ಲಿಕಾರ್ಜುನ ಖರ್ಗೆ, ತೃಣಮೂಲ ಕಾಂಗ್ರೆಸ್‌ನ ಸೌಗತ ರಾಯ್, ಅಖಿಲೇಶ್‌ ಯಾದವ್, ತೇಜಸ್ವಿ ಪ್ರಸಾದ್ ಯಾದವ್, ಸುಪ್ರಿಯಾ ಸುಳೆ, ಸಂಜಯ್ ರಾವತ್, ಡಿ. ರಾಜಾ, ಮಹುವಾ ಮಾಜಿ, ಎಂ.ಎ. ಬೇಬಿ ಹಾಗೂ ಇ.ಟಿ. ಮೊಹಮ್ಮದ್ ಬಷೀ‌ರ್ ಸೇರಿ ಪ್ರಮುಖ ವಿಪಕ್ಷ ನಾಯಕರು ಸಲ್ಲಿಸಿದ್ದಾರೆ. ಅರ್ಜಿಯಲ್ಲಿ ಭಾರತೀಯ ಚುನಾವಣಾ ಆಯೋಗ, ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾ‌ರ್ ಹಾಗೂ ಚುನಾವಣಾ ಆಯುಕ್ತರಾದ ಸುಖ್‌ಬೀ‌ರ್ ಸಿಂಗ್ ಸಂಧು ಮತ್ತು ವಿವೇಕ್ ಜೋಶಿ ಅವರನ್ನು ಪ್ರತಿವಾದಿಗಳನ್ನಾಗಿ ಮಾಡಲಾಗಿದೆ. ಈ ಎಲ್ಲಾ 14 ಲೋಪಗಳನ್ನು ಸರಿಪಡಿಸಿದ ನಂತರವಷ್ಟೇ ಸುಪ್ರೀಂ ಕೋರ್ಟ್‌ನಲ್ಲಿ ಈ ಅರ್ಜಿಯ ವಿಚಾರಣೆ ದಿನಾಂಕ ನಿಗದಿಯಾಗಲಿದೆ.
