ಆಧುನಿಕ ಕ್ರಿಕೆಟ್‌ನಲ್ಲಿ ಬ್ಯಾಟಿಂಗ್‌ ಮೇಲಿನ ಆಕರ್ಷಣೆ ಮತ್ತು ವ್ಯಾಮೋಹ ದಿನದಿಂದ ದಿನಕ್ಕೆ ಗಣನೀಯವಾಗಿ ಹೆಚ್ಚುತ್ತಿದೆ. ಯುವ ಆಟಗಾರರು ಬೌಲಿಂಗ್‌ ಮಾಡವ ಬದಲು ಬ್ಯಾಟ್‌ ಹಿಡಿದು ಅಂಗಳಕ್ಕಿಳಿಯಲು ಮುಗಿಬೀಳುತ್ತಿದ್ದಾರೆ. ಈ ಟ್ರೆಂಡ್‌ ಕುರಿತು ಭಾರತಕ್ಕೆ ಚೊಚ್ಚಲ ವಿಶ್ವಕಪ್‌ ತಂದುಕೊಟ್ಟ ದಿಗ್ಗಜ ನಾಯಕ ಕಪಿಲ್ ದೇವ್ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ಯುವ ಪೀಳಿಗೆಯು ಬೌಲಿಂಗ್‌ನಂತಹ ಕಠಿಣ ಸವಾಲಿನಿಂದ ದೂರು ಸರಿಯುತ್ತಿರುವುದು ಭವಿಷ್ಯದಲ್ಲಿ ಭಾರತದ ಬೌಲಿಂಗ್‌ ಸಾಮರ್ಥ್ಯಕ್ಕೆ ದೊಡ್ಡ ಹೊಡೆತ ನೀಡಬಹುದು ಎಂದು ಅವರು ಎಚ್ಚರಿಸಿದ್ದಾರೆ ಎಂದು ಮೂಲಗಳು ಹೇಳಿವೆ.
ಮುಂಬೈನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಕಪಿಲ್ ದೇವ್, ಪ್ರಚಲಿತ ಕ್ರಿಕೆಟ್ ಮಾನಸಿಕತೆಯನ್ನು ತಮ್ಮದೇ ಆದ ವಿಶಿಷ್ಟ ಶೈಲಿಯಲ್ಲಿ ವಿಶ್ಲೇಷಿಸಿದರು. “ಕ್ರಿಕೆಟ್‌ನಲ್ಲಿ ಬ್ಯಾಟ್ಸ್‌ಮನ್ ಅನ್ನು ಅಧಿಕಾರಿಗೆ ಮತ್ತು ಬೌಲರ್ ಅನ್ನು ಕಾರ್ಮಿಕನಿಗೆ ಹೋಲಿಸಬಹುದು. ಇಂದಿನ ಕಾಲದಲ್ಲಿ ಪ್ರತಿಯೊಬ್ಬರಿಗೂ ಹವಾನಿಯಂತ್ರಿತ ಕೊಠಡಿಯಲ್ಲಿ ಕುಳಿತು ಕೆಲಸ ಮಾಡಲು ಇಷ್ಟವೇ ಹೊರತು, ಯಾರಿಗೂ ಸುಡುವ ಬಿಸಿಲಿನಲ್ಲಿ ಕಷ್ಟಪಟ್ಟು ಬೆವರು ಹರಿಸಲು ಮನಸ್ಸಿಲ್ಲ” ಎಂದು ಟಾಂಗ್ ನೀಡಿದರು.
2027ರ ಏಕದಿನ ವಿಶ್ವಕಪ್‌ ಅನ್ನು ದೃಷ್ಟಿಯಲ್ಲಿಟ್ಟುಕೊಂಡು ಮಾತನಾಡಿದ ಅವರು, ಬಲಿಷ್ಠ ಬೌಲಿಂಗ್‌ ವಿಭಾಗವನ್ನು ಕಟ್ಟುವುದು ಕೇವಲ ಮಂಡಳಿಯ ಜವಾಬ್ದಾರಿಯಲ್ಲ. ಅದು ಆಯ್ಕೆಗಾರರು ಮತ್ತು ಆಟಗಾರರ ಮೇಲೆಯೂ ಒದೆ ಎಂದರು. ಇಷ್ಟಾದರೂ, ಇಂದಿನ ಯುವ ಆಡಗಾರರಲ್ಲಿ ” ನಾವು ವಿಶ್ವಕಪ್‌ ಗೆಲ್ಲಬಲ್ಲೆವು” ಎಂಬ ಆತ್ಮವಿಶ್ವಾಸ ಹೆಚ್ಚಿರುವುದನ್ನು ಕಪಿಲ್ ಶ್ಲಾಘಿಸಿದರು. ಯುವ ಆಟಗಾರರು ಕೇವಲ ಕ್ರಿಕೆಟ್‌ಗೆ ಸೀಮಿತವಾಗದೆ ಹಾಕಿ ಅಥವಾ ಬ್ಯಾಡ್ಮಿಂಟನ್‌ನಂತಹ ಇತರ ಕ್ರೀಡೆಗಳನ್ನು ಆಡಬೇಕು. ಇದರಿಂದ ದೈಹಿಕ ಸಾಮರ್ಥ್ಯ ಹೆಚ್ಚುವುದಲ್ಲದೆ, ಆಟದ ದೃಷ್ಟಿಕೋನವೂ ವಿಸ್ತಾರಗೊಳ್ಳುತ್ತದೆ ಎಂದು ಅವರು ಕಿವಿಮಾತು ಹೇಳಿದರು ಎಂದು ಜಾಲತಾಣ ಮೂಲಗಳು ತಿಳಿಸಿವೆ.
