2026ನೇ ಸಾಲಿನ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸಚ ಪ್ರಶಸ್ತಿ ಪಟ್ಟಿಯಲ್ಲಿ ಕ್ರೀಡಾ ಕ್ಷೇತ್ರದ ಹೆಸರಿನಲ್ಲಿ ರಾಕೇಶ್‌ ಮಲ್ಲಿ ( ಕ್ರಮ ಸಂಖ್ಯೆ 92) ಅವರನ್ನು ಆಯ್ಕೆಮಾಡಿರುವುದು ಪ್ರಶಸ್ತಿ ಆಯ್ಕೆ ಪ್ರಕಿಯೆಯ ವಿಶ್ವಾಸಾರ್ಹತೆ ಹಾಗೂ ಪಾರದರ್ಶಕತೆಯ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಗತ ಲೋಕದ ನಂಟು ಹಾಗೂ ಅಪರಾಧ ಪ್ರಕರಣಗಳ ಹಿನ್ನಲೆಯಿಂದ ಮಾಧ್ಯಮಗಳಲ್ಲಿ ಸುದ್ದಿಯಾಗಿರುವ, ತಾನೇ ಮಾಜಿ ಭೂಗತ ಲೋಕದ ವ್ಯಕ್ತಿ ಎಂದು ಹೇಳಿಕೊಂಡಿದ್ದಾರೆ ಎನ್ನಲಾಗುವ ರಾಕೇಶ್‌ ಮಲ್ಲಿ ಅವರಿಗೆ ಇಂತಹ ಪ್ರತಿಷ್ಠಿತ ಗೌರವ ನೀಡಲು ಮುಂದಾಗಿರುವುದು ಎಷ್ಟು ಸಮಂಜಸ?
ರಾಕೇಶದ ಮಲ್ಲಿ ಅವರು ಪ್ರಸ್ತುತ ರೌಡಿಶೀಟರ್‌ ಅಥವಾ ಹಿಸ್ಟರಿ ಶೀಟರ್‌ ಪಟ್ಟಿಯಲ್ಲಿದ್ದಾರೆಯೇ? ಪ್ರಶಸ್ತಿಗೆ ಆಯ್ಕೆ ಮಾಡುವ ಮುನ್ನ ಪೊಲೀಸ್‌ ಇಲಾಖೆಯಿಂದ ಸೂಕ್ತ ಹಿನ್ನಲೆ ಪೆಇಶೀಲನೆ ನಡೆಸಲಾಗಿದೆಯೇ? ಕ್ರೀಡಾ ಕ್ಷೇತ್ರದಲ್ಲಿ ಅವರ ಸಾಧನೆಗಳೇನು? ಯಾವ ಕ್ರೀಡೆಯಲ್ಲಿ ಯಾವ ಮಟ್ಟದಲ್ಲಿ ಸಾಧನೆ ಮಾಡಿದ್ದಕ್ಕಾಗಿ ಈ ಪ್ರತಿಷ್ಠಿತ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ? ಕ್ರೀಡಾ ಕ್ಷೇತ್ರವನ್ನು ಗುರಾಣಿಯನ್ನಾಗಿ ಬಳಸಿಕೊಂಡು, ವಿವಾದಾತ್ಮಕ ಹಿನ್ನಲೆಯನ್ನು ಮರೆಮಾಚಿ, ಸೂಕ್ತ ಪರಿಶೀಲನೆಯಿಲ್ಲದೆ ಸರ್ಕಾರಿ ಗೌರವ ಪಡೆಯಲು ಅವಕಾಶ ಮಾಡಿಕೊಡಲಾಗುತ್ತಿದೆಯೇ?
ಅವರ ಹೆಸರನ್ನು ಶಿಫಾರಸು ಮಾಡಿವರು ಯಾರು? ಆಯ್ಕೆ ಮಾಡಿದವರು ಯಾರು? ಆಯ್ಕೆಗೆ ಅನುಸರಿಸಿದ ಮಾನದಂಡಗಳೇನು? ರಾಜ್ಯೋತ್ಸವ ಪ್ರಶಸ್ತಿಗಳು ಯಾರದ್ದೋ ಪ್ರಭಾವ ಅಥವಾ ಶಿಫಾರಸಿನ ಆಧಾರದಲ್ಲಿ ನೀಡುವ ಗೌರವಗಳಲ್ಲ. ನಾಡು, ನುಡಿ, ಕಲೆ, ಸಂಸ್ಕೃತಿ, ಕ್ರೀಡೆ, ಹಾಗೂ ಸಮಾಜಕ್ಕಾಗಿ ನಿಸ್ವಾರ್ಥವಾಗಿ ದುಡಿದ ನಿಜವಾದ ಸಾಧಕರಿಗೆ ಸಲ್ಲಬೇಕಾದ ಪ್ರತಿಷ್ಠಿತ ಸನ್ಮಾನ.
ಇಂತಹ ವಿವಾದಾತ್ಮಕ ಆಯ್ಕೆಗಳು ರಾಜ್ಯೋತ್ಸವ ಪ್ರಶಸ್ತಿಯ ಘನತೆಗೆ ಮಾತ್ರವಲ್ಲ, ಕರ್ನಾಟಕದ ಪ್ರತಿಯೊಂದು ಜಿಲ್ಲೆಯಲ್ಲೂ ಗೌರವಿಸಲ್ಪಡುವ ಸಾವಿರಾರು ನೈಜ ಸಾಧಕರ ಗೌರವಕ್ಕೂ ಧಕ್ಕೆ ತರುವ ಆತಂಕವಿದೆ. ಜಿಲ್ಲಾಡಳಿತ ಕೂಡಲೇ ಸಂಬಂಧಪಟ್ಟ ಪೊಲೀಸ್‌ ದಾಖಲೆಗಳು ಹಾಗೂ ಕ್ರೀಡಾ ಸಾಧನೆಗಳನ್ನು ಪರಿಶೀಲಿಸಿ, ಆಯ್ಕೆಯ ಮಾನದಂಡಗಳನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಬೇಕು.
ಆಯ್ಕೆ ಪ್ರಕ್ರಿಯೆಯಲ್ಲಿ ಲೋಪದೋಷಗಳು ಕಂಡುಬಂದಲ್ಲಿ ಪ್ರಶಸ್ತಿ ಆಯ್ಕೆಯನ್ನು ಮರುಪರಿಶೀಲಿಸಬೇಕು. ಕರಾವಳಿಯ ಮಣ್ಣಿನಲ್ಲಿ ನಿಜವಾದ ಸಾಧಕರಿಗೆ ಬರವಿಲ್ಲ. ಹಾಗಿರುವಾಗ ಇಂತಹ ವಿವಾದಗಳಿಗೆ ಅವಕಾಶ ಮಾಡಿಕೊಟ್ಟು ರಾಜ್ಯೋತ್ಸವ ಪ್ರಶಸ್ತಿಯ ಘನತೆಗೆ ದಕ್ಕೆ ತರುವುದು ಯಾಕೆ? ಇದು ಕೇವಲ ಒಬ್ಬ ವ್ಯಕ್ತಿಯ ಆಯ್ಕೆಯ ಪ್ರಶ್ನೆಯಲ್ಲ, ಇಡೀ ಪ್ರಶಸ್ತಿ ಆಯ್ಕೆ ವ್ಯವಸ್ಥೆಯ ವಿಶ್ವಾಸಾರ್ಹತೆ, ಪಾರದರ್ಶಕತೆ ಮತ್ತು ಘನತೆಯ ಪ್ರಶ್ನೆ!
2011ರಲ್ಲಿ ಹೊರಾನಡು ಮುಂಬೈ ವಿಭಾಗದಲ್ಲಿ ಗಣನೀಯ ಸಾಧನೆ ಮತ್ತು ಸಂಘಟನಾ ಚತುರತೆಯನ್ನು ಗುರುತಿಸಿ ಐಕಳ ಹರೀಶ್‌ ಶೆಟ್ಟಿ ಅವರಿಗೆ ಪ್ರತಿಷ್ಠಿತ ನಾಗರಿಕ ಪ್ರಶಸ್ತಿಯನ್ನು ನೀಡಲಾಗಿತ್ತು. ಆದರೆ 2026ರ ದ.ಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಟ್ಟಿಯಲ್ಲಿ ಇದೇ ಐಕಳ ಹರೀಶ್‌ ಶೆಟ್ಟಿ ಹೆಸರು ಕಂಡುಬಂದಿದ್ದು, ಒಂದು ವಿಷಾದನೀಯ. ಏಕೆಂದರೆ, ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ ಉನ್ನತ ಮಟ್ಟದಲ್ಲಿ ತೇರ್ಗಡೆಯಾದ ವಿದ್ಯಾರ್ಥಿಯನ್ನು ಮತ್ತೆ ಏಳನೇ ತರಗತಿ ಪಬ್ಲಿಕ್‌ ಪರೀಕ್ಷೆ ಬರೆಸುವುದು ಸರಿಯೇ? ಇದೆಲ್ಲವನ್ನು ಕಂಡಾಗ ಇದರ ಹಿಂದೆ ರಾಜಕೀಯ ಲಾಭಿಗಳು ಮತ್ತು ಒಬ್ಬರೊನ್ನಬ್ಬರು ಮೆಚ್ಚಿಸಲು ಮಾಡುವ ಕಾರ್ಯ ಎಂಬುದು ಪ್ರಶ್ನಾರ್ಥಕವಾಗಿದೆ. ಇದರ ಜೊತೆಗೆ ಅದೆಷ್ಟೋ ಸಾಧಕರು ಇನ್ನು ತೆರೆಮರೆಯಲ್ಲಿರುವುದು ಇವರ ರಾಜಕೀಯ ಲಾಭಿಗೆ ಸಾಕ್ಷಿ.
ಈ ಬಾರಿಯ ರಾಜ್ಯ ರಾಜ್ಯೋತ್ಸವ ಪಟ್ಟಿಯಲ್ಲಿ ಪಾರದರ್ಶಕ ಆಯ್ಕೆ ಶ್ಲಾಘನೀಯ. ಇದೇ ರೀತಿಯ ರಾಜ್ಯದ ಆಯ್ಕೆ ಮುಂದುವರಿದರೆ ಇನ್ನಷ್ಟು ಸಾಧಕರನ್ನು ಲೋಕಕ್ಕೆ ಪರಿಚಯಿಸಬಹುದು.
