ಪಾಕಿಸ್ತಾನದ ಬಲೂಚಿಸ್ತಾನ ಪ್ರಾಂತ್ಯದಲ್ಲಿ ರಾಜಕುಮಾರ ಹಾಗೂ ಆತನ ಮೂವರು ಅಂಗರಕ್ಷಕರನ್ನು ಕಿಡ್ನಾಪ್‌ ಮಾಡಲಾಗಿದೆ ಎಂದು ತಿಳಿದು ಬಂದಿದೆ. ಹೌದು, ಕುಲಾತ್‌ ಪ್ರಸ್ತುತ ಖಾನ್ ಸುಲೇಮಾನ್‌ ಖಾನ್ ದಾವೂದ್‌ ಪುತ್ರ ರಾಜಕುಮಾರ್‌ ಮಹಮ್ಮದ್‌ ಖಾನ್ ಅಹ್ಮದ್‌ಜಾಯ್‌ ಹಾಗೂ ಅವರೊಂದಿಗೆ ಇದ್ದ ಮೂವರು ಬಂದೂಕುಧಾರಿಗಳನ್ನು ಅಪಹರಿಸಲಾಗಿದೆ. ಸೋಮವಾರ ರಾತ್ರಿ ಖುಜ್ದಾರ್‌ನಿಂದ ಕುಲಾತ್‌ಗೆ ಪ್ರಯಾಣಿಸುತ್ತಿದ್ದ ವೇಳೆ ಹೆದ್ದಾರಿಯಲ್ಲಿ ವ್ಯಕ್ತಿಗಳು ಇವರನ್ನು ಅಡ್ಡಹಾಕಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಅವರ ಬಳಿ ಸಾಕಷ್ಟು ಶಸ್ತ್ರಗಳಿದ್ದು, ಪ್ರಿನ್ಸ್‌ ಅಹ್ಮದ್‌ಜಾಯ್‌ ವಾಹನವನ್ನು ತಡೆದು ರಾಜಕುಮಾರ ಹಾಗೂ ಆತನ ಬಾಡಿಗಾರ್ಡ್‌ಗಳನ್ನು ಕಿಡ್ನಾಪ್‌ ಮಾಡಿದ್ದಾರೆ. ಅವರನ್ನು ಅಜ್ಞಾತ ಸ್ಥಳಕ್ಕೆ ಕರೆದುಕೊಂಡು ಹೋಗಿರುವ ಆರೋಪಿಗಳ ಬಗ್ಗೆ ಯಾವುದೇ ಮಾಹಿತಿ ಪತ್ತೆಯಾಗಿಲ್ಲ. ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ‘ಖಾನ್ ಆಫ್ ಕಲಾತ್’ ಎಂಬುದು, ಪಾಕಿಸ್ತಾನದ ಪ್ರಸ್ತುತ ಬಲೂಚಿಸ್ತಾನ್ ಪ್ರಾಂತ್ಯದಲ್ಲಿರುವ ಕಲಾತ್ ಕೇಂದ್ರಿತ ಬ್ರಾಹುಯಿ-ನೇತೃತ್ವದ ಸಂಸ್ಥಾನವಾಗಿದ್ದ, ಹಿಂದಿನ ‘ಕಲಾತ್ ಖಾನೇಟ್’ನ ಆಡಳಿತಗಾರರ ಐತಿಹಾಸಿಕ ಬಿರುದಾಗಿದೆ. ಕಲಾತ್‌ನ ಖಾನ್ ಅಂದರೆ ರಾಜ ಸುಲೇಮಾನ್‌ ದಾವೂದ್‌ ಸದ್ಯ ಯುನೈಟೆಡ್‌ ಕಿಂಗ್ಡಮ್‌ ಹಾಗೂ ವೇಲ್ಸ್‌ನಲ್ಲಿ ವಾಸವಿದ್ದಾರೆ ಎಂದು ವರದಿಯಾಗಿದೆ.
