ಪುಣೆ: ಗುರುವಾರ ತಡರಾತ್ರಿ ಪುಣೆಯ ಖಡಕ್ವಾಸ್ಲಾ ಸಮೀಪದ ಡೋಂಜೆ ಗ್ರಾಮದ ಅವರ ಫಾರ್ಮ್‌ಹೌಸ್‌ನಲ್ಲಿ ಹಿರಿಯ ನಟ ನಾನಾ ಪಾಟೇಕರ್ ಅವರ ಅಂತ್ಯಕ್ರಿಯೆಯನ್ನು ಸಕಲ ಸರ್ಕಾರಿ ಗೌರವಗಳೊಂದಿಗೆ ನೆರವೇರಿಸಲಾಯಿತು. ಅಂತ್ಯಕ್ರಿಯೆಯನ್ನು ಮರುದಿನ ನಡೆಸದೆ ತಡರಾತ್ರಿ ನಡೆಸಿದ್ದೇಕೆ ಎಂಬ ಪ್ರಶ್ನೆಗೆ ಉತ್ತರಿಸಿದ ಪುತ್ರ ಮಲ್ಹಾರ್ ಪಾಟೇಕರ್, ತಂದೆಯ ನಿಧನ ಮುಂಜಾನೆಯೇ ಸಂಭವಿಸಿದ್ದು, ಅಷ್ಟರಲ್ಲಾಗಲೇ ಸಾಕಷ್ಟು ಸಮಯ ಕಳೆದಿತ್ತು. ಹೀಗಾಗಿ ಅದೇ ದಿನ ಅಂತ್ಯಕ್ರಿಯೆ ನೆರವೇರಿಸಲು ಕುಟುಂಬ ನಿರ್ಧರಿಸಿತು ಎಂದು ತಿಳಿಸಿದ್ದಾರೆ.
ಗುರುವಾರ ಮುಂಜಾನೆ ಗೋವಾದ ತಮ್ಮ ನಿವಾಸದಲ್ಲಿ ತೀವ್ರ ಎದೆನೋವು ಕಾಣಿಸಿಕೊಂಡ ಬಳಿಕ ನಾನಾ ಪಾಟೇಕರ್ (75) ಅಸ್ವಸ್ಥ ಸ್ಥಿತಿಯಲ್ಲಿ ಪತ್ತೆಯಾಗಿದ್ದರು. ವೈದ್ಯಕೀಯ ತಂಡ ಅವರನ್ನು ಪರೀಕ್ಷಿಸಿದ ಬಳಿಕ ಮೃತಪಟ್ಟಿರುವುದಾಗಿ ಘೋಷಿಸಿತ್ತು. ಪುಣೆಗೆ ಮಹಾರಾಷ್ಟ್ರ ಸಿಎಂ ದೇವೇಂದ್ರ ಫಡ್ನವಿಸ್ ಅವರು ಆಗಮಿಸಿ ಅಂತಿಮ ನಮನ ಸಲ್ಲಿಸಿ ಕುಟುಂಬ ಸದಸ್ಯರಿಗೆ ಸಾಂತ್ವನ ಹೇಳಿದರು.
ತಂದೆಯ ನಿಧನದ ಕುರಿತು ಮಾತನಾಡಿದ ಮಲ್ಹಾರ್ ಪಾಟೇಕರ್, “ನಾನಾ ಸಾಹೇಬ್ ಅವರಂತಹ ವ್ಯಕ್ತಿ ನಿಜವಾಗಿಯೂ ನಮ್ಮನ್ನು ಎಂದಿಗೂ ಅಗಲುವುದಿಲ್ಲ. ಕಳೆದ ಎರಡು ದಿನಗಳಿಂದಲೂ ನಾನು ಇದನ್ನೇ ಹೇಳುತ್ತಿದ್ದೇನೆ. ಅವರಂತಹವರು ತಮ್ಮ ಕೆಲಸದ ಮೂಲಕ ಸದಾ ಜೀವಂತವಾಗಿರುತ್ತಾರೆ. ಮರಾಠಿಯಲ್ಲಿ ಇಂತಹ ವ್ಯಕ್ತಿಗಳನ್ನು ‘ಅಜರಾ ಮರ’ ಎಂದು ಕರೆಯುತ್ತೇವೆ. ಅಂದರೆ, ಎಂದಿಗೂ ಅಳಿಯದವರು ಎಂಬರ್ಥ” ಎಂದು ಹೇಳಿದರು. “ನಾನಾ ಸಾಹೇಬ್ ಯಾವಾಗಲೂ ಒಂದು ವಿಚಾರವನ್ನು ಹೇಳುತ್ತಿದ್ದರು. ‘ಮಾನವೀಯತೆಯ ಹೆಸರಿನಲ್ಲಿ ನಾವೆಲ್ಲರೂ ಒಂದಾಗಿ, ಜಗತ್ತಿನ ಒಳಿತಿಗಾಗಿ ಕೆಲಸ ಮಾಡೋಣ’ ಎಂಬ ಮಾತನ್ನು ಅವರು ಪದೇ ಪದೆ ಪುನರುಚ್ಚರಿಸುತ್ತಿದ್ದರು” ಎಂದು ತಂದೆಯ ಆದರ್ಶಗಳನ್ನು ಸ್ಮರಿಸಿದರು.
